لەم چالاکییەدا، ئێوە فێردەبن چۆن سیستمی ئامانجی SMART بەکاربهێنن بۆ دانانی ئامانجێکی ڕوون و کاریگەر بۆ پەیجێکی سۆشیال میدیا  (بۆ نموونە، پەیجی فرۆشگایەکی جلوبەرگ، کافێیەک، یان هەر بیرۆکەیەکی تر).

ئامانجەکانی SMART یارمەتیتان دەدەن کە پلانەکانتان ورد، پێوانەپێکراو، واقیعی، پەیوەندیدار و کاتدار بن.

بۆ ئەنجامدانی چالاکیەکە سوود لەم فۆڕمە وەربگرن کە هاوپێچ کراوە و کارەکەشتان  لە وانەی داهاتوودا لە ڕێگەی پاوەرپۆینتەوە (PowerPoint) پێشکەشی بکەن. 

S - Specific (دیاریکراو)

ئامانجەکەت دەبێت ڕوون و ورد بێت. وەڵامی ئەم پرسیارانە بدەرەوە:

دەتەوێت چی بەدەستبهێنیت؟

بۆچی ئەم ئامانجە گرنگە؟

کێ بەشدار دەبێت؟ (بۆ نموونە، تیمی سۆشیال میدیا)

لە کوێ ئەنجام دەدرێت؟ (بۆ نموونە، لەسەر پلاتفۆرمی ئینستاگرام)

سەرچاوە و سنوورەکانت چین؟

نموونە بۆ پەیجێکی فرۆشتنی جلوبەرگ:

زیادکردنی کارلێک (engagement) لەسەر پەیجی ئینستاگرامی براندەکەمان لە ڕێگەی هاندانی بەکارهێنەران بۆ بەجێهێشتنی کۆمێنت و شێرکردنی پۆستەکانمان.

M - Measurable (پێوانەپێکراو)

پێویستە بتوانیت پێوانەی پێشکەوتنی ئامانجەکەت بکەیت.

چەندێک؟ چەندەها؟

چۆن دەزانیت کە گەیشتوویتەتە ئامانجەکەت؟

نموونە:

بەرزکردنەوەی تێکڕای ژمارەی کۆمێنتەکان لە (٥) بۆ (٢٥) کۆمێنت لەسەر هەر پۆستێک، و زیادکردنی تێکڕای فۆلۆوەرس لە  (١ هەزارەوە) بۆ (٥) هەزار. دەتوانین لە ڕێگەی Instagram Insights چاودێری ئەم ژمارانە بکەین.

A - Achievable (بەدەستهێنراو/واقیعی)

ئایا ئامانجەکەت واقیعییە و دەتوانیت بەدەستی بهێنیت؟

چۆن دەتوانیت ئەم ئامانجە بەدەست بهێنیت؟

ئامانجەکەت تا چەند ڕاستەقینەیە بە لەبەرچاوگرتنی تواناکانت؟

نموونە:

بەڵێ، ئەمە بەدەست دێت لە ڕێگەی باشترکردنی کوالیتی ناوەڕۆک، دروستکردنی پۆستی پرسیار و وەڵام، ئەنجامدانی کێبڕکێی مانگانە، و وەڵامدانەوەی خێرای کۆمێنتەکان بۆ هاندانی زیاتری بەکارهێنەران.

R - Relevant (پەیوەندیدار)

ئایا ئەم ئامانجە گرنگە بۆ ئامانجە گەورەکەت؟ ئایا لە کاتێکی گونجاودایە؟

ئایا ئەم ئامانجە شایەنی هەوڵدانە؟

ئایا ئەمە کاتی گونجاوە بۆ ئەم ئامانجە؟

ئایا کاریگەریی چی دەبێت لەسەر براندەکەت؟

نموونە:

بەڵێ، کارلێکی زیاتر کۆمەڵگەیەکی بەهێزتر لە دەوری براندەکەمان دروست دەکات، متمانەی کڕیار زیاد دەکات، و لە کۆتاییدا دەبێتە هۆی زیاتر ناساندنی براندەکەمان و زیادبوونی ڕێژەی فرۆش.

T - Time-Bound (کاتدار)

پێویستە کاتێکی دیاریکراو بۆ بەدەستهێنانی ئامانجەکەت دابنێیت. ئەمە وادەکات زیاتر پابەند بیت.

کەی دەست پێ دەکەیت و کەی کۆتایی دێت؟

پاش مانگێک چی ڕوودەدات؟ پاش شەش مانگ؟

کەی دەگەیت بە ئامانجەکەت؟

نموونە:

دەمانەوێت لە ماوەی ٣ مانگی داهاتوودا (تا کۆتایی ئەم وەرزە) بگەین بەم ئامانجە. هەفتانە چاودێری پێشکەوتنەکان دەکەین و لە کۆتایی هەر مانگێکدا هەڵسەنگاندن دەکەین.

کۆکردنەوەی هەموو بەشەکان: ئامانجی کۆتایی SMART

کاتێک هەموو بەشەکانت پڕکردەوە، دەتوانیت ئامانجەکەت لە یەک ڕستەی ڕوون و پوختدا بنووسیتەوە.

نموونەی کۆتایی:

"ئامانجی ئێمە زیادکردنی ڕێژەی کارلێکە لەسەر پەیجی ئینستاگرامی براندەکەمان، بە شێوەیەک کە  فۆڵۆوەرسەکانمان بگاتە ٥ هەزار و تێکڕای کۆمێنتەکان بگاتە ٢٥ لەسەر هەر پۆستێک. ئەمەش لە ماوەی ٣ مانگی داهاتوودا لە ڕێگەی باشترکردنی ناوەڕۆک و ئەنجامدانی چالاکییەوە بەدەست دەهێنین، بە مەبەستی بەهێزکردنی کۆمەڵگەکەمان و زیادکردنی فرۆش."

ئێستا نۆرەی ئێوەیە! پەیجێکی هەڵبژێرن و بەپێی ئەم هەنگاوانە ئامانجێکی SMARTی تەواوی بۆ دابنێن.